上海，好人家個囡兒勿跳廣場舞

原創 何菲 海上夢疊

作者：何菲

滬語講述：何振華

滬語記錄：飛飛

審定推薦：丁迪蒙

編輯：王乙其

“好人家”，搿個充滿了上海趣味個褒義描述，勒勒現在年輕一代人裡廂，已經碰大勿著了。“好人家”搿三個字，一定是要用上海言話來讀，再能體味出其中蘊涵個低調搭仔自矜。

所謂好人家，勒勒滬語個語境裡，指個是生活程度中等、安定、知書達理個規矩人家，大多數是踏實本分個，正統中庸個。好人家個囡兒，有個是溫婉個秉性、良好個教養，實惠但又有相當感性個生活情趣。

伊拉個上一代，可能就是真正個淑媛，到仔伊拉搿代人，由於時代個變故、現世個急迫，器局勿得勿縮小一圈。因為物質浪見過眼世面，也吃過眼苦頭，精神浪對閱歷個提煉，能夠落實到平常日腳生活當中個柴、米、油、鹽。伊拉情緒雖然會得有起落，火氣呢是勿大有了，更加善於自家告自家講和、調定、擼平、扭轉生活個僵局。

伊拉從年齡浪是輕熟女個母親一代，雖然同樣是職業女性，但更偏於傳統、溫儒、居家，擅長用生活個瓶中水，勾兌出物質搭精神層面有所互動個酒，卻觸手可得、毫無懸念。伊拉追求個感覺比較貼肉，樂天知命而且是隨遇而安，伊拉相信傳奇不過是傳奇。

伊拉最大個特色是圓融。因為嘸沒大富大貴，所以勿驕，也嘸沒貧寒，所以勿哀。“溫柔而勿妥協，勒安靜中不慌不忙個堅強”。上有老下有小個年紀，勒職場家庭複雜個人際關係中騰挪，遊刃有餘，還勿忘記享受享受人生個樂趣，比方勒屋裡開心燒得一手好菜、想出門了就盡興多白相幾個地方、懂時尚、靜得下來也讀得進自家歡喜看個書。

以伊拉個年齡、所經歷個時代，過個日腳絕對算勿上完美，但始終是盡力而為，甚至對於像煞是悲劇個人生大局也能從容以待，既勿厭倦，也勿動怒。世態炎涼看得多了，當然曉得社會浪個路哪能會好走，所以要自我鬆綁、自家會得尋樂趣。告熟女相比，伊拉多了秀雅多了甜蜜，少了桀驁少了逼人。搭伊拉相比，熟女就多了清華靈媚，少了絮絮煩瑣。

伊拉通常對生活有一個比較具體可行個前瞻，因此有能力以穩定個心境應萬變個世態。假使家庭收入是三塊銀洋鈿個說話，伊是迭能規劃個：一塊銀洋鈿作為家用，一塊銀洋鈿去儲蓄以備急用，還有一塊銀洋鈿呢用來交際應酬、娛樂搭仔休閒。

伊拉勒相夫教子之餘一直邪氣努力個保持身為女人個平衡狀態，總是勿自覺個拿辰光分成三份：一份撥勒自然，一份撥勒內心，一份告人相處。做了娘，伊拉就是母親中個尖子，當了婆婆，勿排除伊拉也屬於隱性難搞個型別。

好人家個囡兒，懂得善於拿自家沉到生活裡。伊拉勿大會光顧百樂門光滑得像鏡子一樣鋥亮個彈簧舞池，告埃些頭髮鋥亮、光可鑑人、舞技精湛、自稱“老師”個舞男們跳舞，但有個辰光會去酒吧聽田果安個老爵士。

有一點可以肯定，伊拉是勿會去跳廣場舞個，伊拉勿會十日八國遊，伊拉勿會穿又謽又勿得體個旗袍東奔西竄、花絲巾窮揮八揮、迎風拍照，雖然後者是有生機勃勃個熱力，卻也能顯出市井悍婦個底板。好人家個囡兒儕曉得，分寸一旦缺乏，就是油膩感個開始。

周小燕先生

伊拉個頭發做得邪氣精緻，面色清爽，修過眉毛但絕對勿會紋眉毛紋眼線，更勿會打玻尿酸。伊拉塗淡彩口紅，穿了真絲襯衫配風衣蕩馬路，一片梧桐葉落勒身浪，也有一剎那個詩意。

伊拉個胃搭仔膽囊是全球化個，既能裝大餅油條，又能裝芝士紅酒，可以生煎饅頭配咖啡，拿破崙蛋糕配咖哩牛肉粉絲湯也來賽。伊拉勒吃高頭上歷來不拘一格而且孜孜以求，善於勒精微之中顯出格局搭仔變化來。

一進灶披間，伊拉再哪能自謙，拿得出幾隻拿手家常菜，五香素雞、響油鱔絲、黃魚鯗紅燒肉、老鴨扁尖湯、薺菜大餛飩……伊拉也會做幾樣別個物什，松茸天婦羅、醉蟹、乾巴菌火腿炒飯、海鹽奶蓋烏龍茶……

伊拉熟練個使用各種生活類APP，有熟悉個海外代購、冷鏈海鮮直郵，用小紅書，也勿排斥拼多多。伊拉白相烘焙，白相手作，吃日本料理，去有風景或者有花園個地方吃一提鳥籠子下午茶，要是佛系起來，伊拉會去寺廟裡禪修，住個幾日天（發發朋友圈）。

伊拉有要好個閨蜜搭仔小有感覺個藍顏知己，說體己話、做有情事。歷盡世事個伊拉內心邪氣超脫，人生似甜實苦，要好朋友之間彼此具備一顆有共情力個心，再大氣點，懂點，搿就夠了，勿會勉強自家去抓取埃些抓不到個東西搭仔勿世出個人，也勿會滿腦子個標準答案。

伊拉歡喜有腔調個人像搭仔靜物攝影，偏愛花園洋房、外灘、陸家嘴，雖然多數是擺拍。伊拉講禮數懂世故招搖，卻也希望讓人家儕曉得：自家也蠻來三。伊拉需要掌聲。

一代一代個好人家個囡兒，就迭能勒精緻搭豪爽、感性搭理智、自在搭紛亂之間，靈活擺渡，伸展自如，直到遲暮之年。林語堂勒《京華煙雲》中講得透徹：“從姚思安身浪，木蘭學到個是生命個大道，而莫愁掌握個是世俗個智慧。交關年數之後，我再明白過來，埃個其實應該是一個女人個兩面。”

作者：何菲

講述：何振華

——————————————————

丁迪蒙

迪蒙，啟迪矇昧者也。上海市人。原上海大學中文系教師，多年來一直致力於滬語和海派文化的傳承。

滬語是吳方言的代表方言，是吳儂軟語的典範。她既可以用來拉家常，也同樣可以用來朗讀各類詩歌散文。

滬語完全可以書寫，同粵語可以寫作是一樣的。本平臺所有文章都是經過改寫後，用滬語來演繹的，漢字書寫也是正確的。

丁迪蒙所撰寫的，與滬語相關的著作主要有：

《學說上海話》上海科技文獻出版社

《聽聽說說上海話》少年兒童出版社

《實用滬語》復旦大學出版社

《上海話繞口令》少年兒童出版社

《上海方言詞語使用手冊》上海教育出版社

《上海話讀成語故事》少年兒童出版社

《囡囡學童謠》，少年兒童出版社

《囡囡學成語》，少年兒童出版社

原標題：《上海，好人家個囡兒勿跳廣場舞》