您現在的位置是：首頁 > 藝術

滬語悅讀：梧桐，上海人個鄉愁

由澎湃新聞客戶端發表于藝術2023-02-07

簡介丁迪蒙所撰寫的，與滬語相關的著作主要有：《學說上海話》上海科技文獻出版社《聽聽說說上海話》少年兒童出版社《實用滬語》復旦大學出版社《上海話繞口令》少年兒童出版社《上海方言詞語使用手冊》上海教育出版社《上海話讀成語故事》少年兒童出版社《囡囡學

梧桐是不是詞語

作者：湘君

改寫：丁曙立

講述：王浩峰

審閱、推薦：丁迪蒙

編輯：王乙其

提起能夠代表上海特色個風物，交關人儕會得馬上聯想到梧桐樹。一位移居海外個朋友，漂泊了大半世人生，魂牽夢縈、念念勿忘個，始終是童年時代個梧桐街區。伊常莊認真個搭人家講：“於我而言，世界個盡頭勿是如來佛個五指山，勿是哥倫布個新大陸，而是小辰光居住個‘鉅富長’。”梧桐是伊個鄉愁，帶勒憂鬱個輕藍。

也勿是每個人儕歡喜梧桐樹個。我曾經帶了個鄰居到梧桐街區去散步，數遍一排排密集整齊個行道樹，欣賞一座座青苔留痕個老洋房，走發走發，我熬勿牢感嘆了——真漂亮個樹啊。不過，我個迭個東北芳鄰一眼也嘸沒感覺，勒我嘮嘮叨叨、津津有味、滿腹詩情畫意個辰光，伊個冷靜語調拿我滿腔個煽情澆滅了：“你從小在這樣的環境里長大，可我的成長經歷並沒有這樣的氛圍，所以你能感受到的，我完全不能。”我曉得，勒伊個眼睛裡向，梧桐樹是灰顏色個。

梧桐樹真實個基底是綠顏色。生如夏花，樹也同花，伊拿最旺盛個生命力儕積累到了盛夏時節，舒展，茂盛，綻放，密密匝匝，層層疊疊，枝葉參天，華陰如蓋，隔絕了暑熱，帶來了清涼。兩邊參差互動個葉子沿牢仔街道無限個延伸，好像一條條綠顏色個時光隧道。邊浪向個房屋建築，還有路過個車輛行人，好像儕撥染上了一層綠意。

也有人偏愛深秋裡個梧桐。葉子變成功金黃色了，間隔了幾片楓葉一樣個嫣紅，勒映照秋日明媚個陽光，燦爛，耀眼，讓人著迷，好像一年一度盛大個宴會。勒城市當中劃分出幾條景觀街道，踏勒厚厚叫個一層落葉浪向，好像高山浪個積雪一樣，發出咔嚓、咔嚓個清脆個響聲，勒勒奏響一曲人搭城市個戀歌。

秋去冬來，梧桐個樹葉幾乎儕落光了，只剩下來幾片、孤零零個吊勒枝頭浪，隨風搖擺，像煞是歐·亨利筆下頭迭眼帶有特殊使命個葉子。有年大冷天，我路過陝西南路永嘉路附近，突然發現乾枯個梧桐樹葉子展現出一種奇異個色彩。我拿出手機拍下來看，更加明顯了：伊竟然是一種輕柔個粉色，原本是屬於櫻花個顏色。乾枯、衰敗撥賦予了神奇個生命力，顯示出一種勿真實個浪漫。帶勒對超自然現象個疑惑再走了幾步，我心裡向豁然開朗了。