您現在的位置是：首頁 > 運動

海上疊夢：“昂碰昂”

由澎湃線上發表于運動2022-01-04

閒話上海老底子昂碰昂假使

簡介上海人個口頭語“硬碰硬”，現在變成功“昂碰昂”——搿個是蘇北口音個上海閒話，就像小辰光看到個啞子賣刀，蹲勒路旁，刀砍鋼絲，一刀下去一斷，一刀下去一斷，心急得來屏勿牢，哇啦哇啦喊：“昂碰昂

昂啥意思是什麼

李群上海老底子

“昂碰昂”

改寫與朗讀：李群

滬語指導：丁迪蒙

點選下方收聽音訊，時長6分24秒。

上海閒話勿是本地閒話。本地閒話是指個浦東閒話。

上海開埠（1843年）也就是有了城鎮有了通商以後，各地個人儕到上海來討生活，其中蘇州人、無錫人、寧波人、紹興人、廣東人、福建人、蘇北人、安徽人、山東人比較多一點。

當年個上海灘已經鬧猛起來了，賽過紐約個法拉盛——美國最大個中國城。伊個辰光聽勿懂個勿是外國閒話，而是外地閒話。大家軋勒一個房簷下頭，經過長期個磨合，為了生意、生存、搭仔過日腳雜交出上海閒話。搿個是各個地方語言妥協以後得出個最大公約數，搿個裡向，蘇州閒話搭寧波閒話影響最大，以此為基調，形成了上海閒話。上海閒話個“嗲”是從蘇州閒話“嗲妹妹”來個；同樣意思個“贊”，根本就是揚州方言：“《水滸》就是一把贊壺”；“哪能”（咋啦）是蘇州人挑釁語“哪亨”個變異。阿大阿二搿個是從“寧波阿孃”個語系裡演變過來個。

1999年我勒瑞金二路電話亭裡回覆拷機浪個來電，聽到電話間老阿姨勒嘎山河：“7號裡（198弄）又吵翻天唻，儕想賣脫房子搬出去。”唉，假使搿能說話，老可能一棟新式里弄出售咾？我馬上上門去打聽，考慮我好動遷唻。樓上樓下四戶人家，立勒底樓姓謝個屋裡門口頭，一致對外個盤問我：“李先生屋裡向住勒啥地方？”上只角個人思想浪地域觀邪氣強烈，哪怕是講渾身勿搭界個話題，也要抖出來豁豁，上海閒話講就是：賣樣賣樣！北方人講個：顯擺顯擺。我乾脆爽氣個回答：“大楊浦個！”其中一位中年婦女馬上雙手抱胸，居高臨下個提示我：“迭只地段李先生是看得懂個。”用眼角瞟儂，意思是：迭只地段是高檔地區哦，曾經是法租界，伊個腔調準備就勢搭儂抬高房價了。我假痴假呆，客客氣氣個好聽閒話撥伊：“靈光個地段！”再話鋒一轉：“不過，四家人家軋勒一道就勿靈光了，早浪向上廁所個辰光，人個生物鐘儕差勿多個，迭個辰光，女個坐勒裡向馬桶浪，男個拎牢褲子立勒門外頭，還要排隊起蓬頭，像拎只鋼種鑊子排隊買生煎饅頭。”最後“既勿方便，也勿雅觀”搿句閒話還嘸沒講出來，伊拉幾家頭一道對牢我發齁唻：“好了好了，要買就買，勿要講得介骯三好伐！”骯三，是英文on sale（賤賣）的諧音，上海閒話裡向夾了外國閒話個元素，也就是俗稱個洋涇浜閒話。

搿些年上海閒話勒勒變化。年輕一代講“我”，基本浪儕是圓口型發聲，北方閒話對上海衝擊忒嚴重了。上海人個口頭語“硬碰硬”，現在變成功“昂碰昂”——搿個是蘇北口音個上海閒話，就像小辰光看到個啞子賣刀，蹲勒路旁，刀砍鋼絲，一刀下去一斷，一刀下去一斷，心急得來屏勿牢，哇啦哇啦喊：“昂碰昂！”千年鐵樹開了花。

現在要了解上海人家個背景，只要聽聽小囡個口語，基本可以判斷家庭經濟背景：一口地道上海閒話個，葛末多數是外婆帶大個，外婆肯定是個“楊白勞”。假使小朋友上海閒話老生硬個，夾了外地口音個，葛末是常年請鐘點工個家庭。假使是外地口音，但是聽勿出地域，搿個是一般用用鐘點工，鐘點工流動性大，自然小囡個方言也混亂了。假使猜得出地域，葛末是有住家保姆個。假使是一口標準方言，說明保姆忠誠度高，家長也厚道。